6 أكتوبر 2026 .. تاريخ فرحة وطن، تاريخ فرحة انتظرناها كثير، تاريخ عودة منتخبنا لمنصات التتويج بعد غياب طويل. والله ما اعرف كيف اعبر عن فرحتي ولا اعرف كيف اوصف شعوري في هذي اللحظة، شعور الفرحة مع المنتخب غيير شعور ماقد حسيته مع اي فريق اشجعه. بطولة مستحقة وبكل جدارة بعد مشوار تاريخي لمنتخبنا، تصدرنا مجموعتنا بالعلامة الكاملة، واجهنا قطر في نصف النهائي بمباراة صعبة حسمناها بركلات الترجيح بعد تألق العويس. واليوم في النهائي بحضور مرعب وقوي من منتخبنا بربع ساعة قدرنا نسجل هدفين ونحسم المباراة والأجمل اننا انهينا البطولة بدون ما نستقبل ولا هدف. منتخبنا لعب بروح وقتالية عالية، لاعبين تحملوا المسؤولية وكانوا قدها، شكرا لكل لاعب فيهم شكرا لانهم ما خذلوا الجمهور اللي وقف معهم، ولا خذلوا كل سعودي كان ينتظر ومتعطش يفرح ببطوله مع المنتخب. وقفة احترام وشكر وتقدير للجمهور السعودي، من أول مباراة إلى النهائي، حضور ودعم ما توقف وخصوصًا اليوم الجمهور كان شيء مرعب تشجيع وصخب من أول دقيقة كانت سبب بعد توفيق الله بحماس اللاعبين والتأثير على الخصم. تحقيق البطولة جا في وقت مهم الف مبرووك لكل سعودي وسعودية، وباذن الله تكون بداية عودة الأخضر لمنصات التتويج والهدف الأكبر هو تحقيق بطولة اسيا في أرضنا وبين جماهيرنا 🇸🇦💚💚💚. ولا تنسون فهد المولد من دعواتكم، عسى ربي يشفيه ويعافيه.