لو هعد احسن احسن ٥ ايام و لحظات فحياتي بشكل عام فا المركز الاول هيكون يوم 2022/12/18 مش هنسى ابدا اليوم ده بتفاصيله كنت في تانيه ثانوي و يومها وكان فيه ماتش فرنساوي وقت الماتش بظبط و قولت للحج اغيب عشان اشوفه مرضاش فا روحت غصب عني و انا مبضون بس شحنت نت و روحت هناك شغلت الماتش فالخفاء كده من غير ما المستر ياخد باله و من احسن اللحظات الي فاكرها ان الاتنين الي على يميني و شمالي اتفرجو معايا على الماتش و كل اما المستر يقرب الي جمبي يزعدني عشان اخبي التليفون... الحصة خلصت و بنفس الوقت كان الشوط الاول من الماتش خلص فضلت اجري فالشارع زي المجانين عشان اعرف اروح القهوه ل صحابي الي كلهم حرفيا كانو بيشجعو فرنسا و انا الارجنتين وصلت قبل الشوط التاني ما يبدأ و قعدنا نتفرج و كان حرفيا شوط تاني اقل ما يقال عليه انه متكامل اوي و كان مليان لحظات مرعبه خصوصا ريمونتادا فرنسا ب جونين في اقل من دقيقتين حرفيا الشوطين الاضافيين بدأو و انا كنت مرعوب و اول مره فحياتي ماتش كوره يخليني بالحماس ده تصدي ايميليانو مارتينيز وصل فالدقيقه ١٢٣ ل كورة كولو مواني و مش هبالغ لو قولت ان قلبي حرفيا كنت حسيت انه هيقف من المشهد الي انا شايفه ده حرفيا احسن تصدي و احسن اداء شوفته فحياتي ضربات الجزاء وصلت و مع كل ضربه حرفيا انا بحس انها قربت لغاية تصدي ايمليانو لكورة كومان وبعدها شوطه جونزالو مونتييل الي وقفت قلبنا كلنا معاها و فالاخر كسبنا عمري ما هنسى كلام الشوالي الي هيثبت في دماغي طول حياتي شيل شيل شيل شيل يا طويل العمر شيل شيل البطولة شيل شيل الذهب شيل شيل الغالية شيل شيل الكوبا شيل شيل الموندو شيل شيل العالم شيل