ألا يالله مداخيل الفرح بابها صوبنا مردود يا كم وقعة حاصلة في الحياة ما فهمناها يصيب العنا واحد داخلة ضايع ومجرود ظروف حاصلة في الزمن والله ما شرطناها على صادق الخير ترا دايما نبذل المجهود نسوق الطواري كل ابوها من اولها ليا اتلاها ذبحني من الضيقة سيفي القايم المحدود قضت نفسي على نفسي بضرب يمناها بقى خاطري منهك وتايه ومبلي ومضهود وغدت نفسي تذوق العنا بواقع اليوم معناها فلاني مدلل في الحياة ولاني بآخر العنقود ولا الحاجة اللي تبيها النفس هاليوم تلقاها وأنا داخلي ميت الليلة وقلبي عليه قيود وضيق سكن في داخل عروقي وقام يملاها رميت أحلامي الكبرى كلتها صغار الدود سكنت بداخل التعاسة رضيت بحكم مجراها فلا ودي بشاهد على دمعي ولا ودي بمشهود كتمت الضيقة بصدري ولا ودي حد يقراها رفعت ايديني الثنتين رجيت الواحد المعبود عسى نفسي تترك سيرة الضيقة الليلة وتنساها